هەرزان
ئەم بابەتە لەسەر هۆکارەکانی خراپبوونی گێڕی ئۆتۆماتیکە و لە لایەن تیمی ناوەڕۆکی هەرزانەوە نووسراوە.
بە ڕەچاوکردنی چەن تێبینییەکی ئاسان و بەکارهێنانی دروست ئەکرێ بەر بە تێچوونی پارەیەکی زۆر بگیرێ و تەمەنی گێڕ دوو هێندە بکرێتەوە.
- لە گۆڕینی دۆخی گێڕ (P, R, N, D) لە کاتێ ڕێکردنی سەیارەدا دوور بکەونەوە. کرداری میکانیکیی گۆڕینی حاڵەتەکانی گێڕی ئۆتۆماتیک بە ڕێگەی ژمارەیەکی زۆری کەلاچ و شریتی ناو گێڕەوە جێبەجێ ئەکرێ. ئەم کەلاچ و شریتانە هەندێ شتیان تیایە کەوا بە دروستکردنی لێکخشان کرداری گۆڕینی گێڕ جێبەجێ ئەکەن.
لە پێش گۆڕینی گێڕ بەتەواوی بوەستن و قاچ لەسەر برەیک بنێن و پاشان گێڕەکە بگۆڕن.
- لە کاتی گێڕی بۆشدا (NEUTRAL) شۆفێری مەکەن. بۆشکردنی گێڕ لە لێژاییدا لە سەیارەی گێڕ ئۆتۆماتیکدا مەسرەفی بەنزین کەم ناکاتەوە. سەیارە ئۆتۆماتیکەکان بۆخۆیان زیرەکن و لە کاتی جادەی سەرەو خواردا پرۆسەی گەیاندنی بەنزین بۆ مەکینە کەم ئەکاتەوە و بۆخۆی بەر بە سەرفی زۆری بەنزین ئەگرێ.
- قەد بۆ ئەوەی خێراییی سەرەتاییتان زۆرتر بێت، لە کاتێکدا قاچتان لەسەر پایدەری بەنزینە، دۆخی (DRIVE) هەڵمەبژێرن. هێشتنەوەی قاچ لەسەر پایدەری بەنزین لە دۆخی بۆش و پاشان گۆڕینی گێڕ بۆ دۆخی D بۆ ڕێکردن ئەتوانێ زیانێکی زۆر بە گێڕەکەتان بگەیەنێت. (دیارە مەبەست ئەوەیە ئەم دوو حاڵەتە بە شێوەیەکی هاوکات بکرێن زیانی هەیە)
- لە پێش وەستانی بەیەکجاریی سەیارەکە، گێڕەکە مەخەنە دۆخی P واتە وەستان. زۆربەی سەیارە ئۆتۆماتیکە تازەکان بۆخۆیان ڕێگەتان نادەنێ لە پێش وەستانی بەیەکجاری دۆخی گێڕەکە بخەیتە سەر دۆخی P.
- گۆڕینی ڕۆنی گێڕی ئۆتۆماتیک لە کاتی گونجاوی خۆیدا زۆر زۆر گرنگە. ئەشیاکانی ناو گێڕ پلەیەکی گەرمیی بەرزیان هەیە و لە ئەگەری گونجاونەبوون یان کەمبوونی ڕۆن یان نەگۆڕینی لە کاتی خۆی و یان تێکردنی ڕۆنی هەڵە، زیانێکی زۆر و تێچوویەکی زۆری بەدواوە ئەبێت. باشترین حاڵەت ئەوەیە هەموو 5000 کیلۆمەتر جارێک ئاستی ڕۆنی گێڕ بە ئامێری تایبەت فەحس بکرێ و پێشنیاری تیمی هەرزان ئەوەیە دوو ساڵ جارێک یان هەموو 50 هەزار کیلۆمەتر جارێک (هەر کامەیان زووتر گەیشت) ڕۆنی گێری ئۆتۆماتیک بگۆڕدرێت.
هەر لە هەرزان ئەم بابەتەش بخوێننەوە: 6 خاڵی گرنگ کەوا خاوەنی سەیارە گێڕ ئۆتۆماتیکەکان پێویستە بیزانن
بۆ کڕین و فرۆشتنی هەر جۆرە سەیارەک لەم لینکەوە سەردانی سایتی هەرزان بکەن.
